Næmingatænastur
Næmingatænastan á Miðnámi í Vestmanna fevnir um lestrarvegleiðing, orðblindatænastu, sálarfrøðitænastu og bókasavn.
Endamálið er at tryggja, at okkara næmingar og lærlingar fáa tann serfakliga stuðul, og ta vegleiðing og hjálp, sum teimum tørva, fyri at útbúgvingartíðin á MIV verður so góð sum yvirhøvur gjørligt. Somuleiðis vil næmingatænastan eisini vera við til at styrkja fakligu og sosialu menningina hjá næmingunum og at hjálpa við praktiskum spurningum.
Eru spurningar ella ivamál ber altíð til at seta seg í samband við Næmingatænastuna. Vit eru her fyri at hjálpa tær.
Á bókasavninum á Miðnámi í Vestmanna eru serliga bøkur, sum hava við lærugreinarnar á skúlanum at gera.
Barbara Marinardóttir hevur bókasavnið um hendi.
Bókasavnið er opið, tá ið skúlin er opin.
Á bókasavninum fært tú vegleiðing og hjálp, tá tú hevur tørv á at finna rætta tilfarið, annaðhvørt tað er á bókasavni skúlans, á Landsbókasavninum ella kommunalu bókasøvnunum.
Miðnám í Vestmanna veitir næmingum og lærlingum vegleiðing og ráðgeving í at menna lesi- og skriviførleikar og veitir serliga hjálp, tá talan er um orðblindni og aðrar líknandi trupulleikar.
Í 1. flokki verða allir næmingar kannaðir í mun til lesifatan og skriviførleika, og við støði í kanningini hevur logopedurin samrøður við næmingarnar um týdningin av góðum lesi- og skriviførleikum og um, hvussu hesir førleikar kunnu stimbrast og mennast.
Tykist lesing ella skriving trupul á onkran hátt, fáa næmingar serliga ráðgeving og tilboð um t.d. talgild hjálparamboð og/ella tilboð um serligar umstøður til próvtøku.
Tey mest vanligu hjálparamboðini eru OCR-talgildir tekstir, atgongd til NOTA (ljóðbókasavn). Hesi átøk standa ikki í próvnum.
Allir næmingar eru vælkomnir at seta seg í samband við logopedin til prát, vegleiðing og ráðgeving.
Málmót v. Maybritt við Strond, mvs@malmot.fo – tlf. 21 91 90
Lestrarvegleiðari hjá øllum flokkum er Hans Jacob Kollslíð, hans.jacob@skulin.fo - tlf. 790 370
Hans Jacob er at hitta á Næmingatænastuni:
Týsdagar kl. 13:30 – 14:15
Mikudagar kl. 10.30 – 14.15
Tú kanst annars altíð seta teg í samband við Hans Jacob, so finna tit útav, nær tað liggur best fyri at fáa eitt prát. Send ein telduport ella ring.
Lestrarvegleiðingin á Miðnámi í Vestmanna veitir vegleiðing í flokkinum eins væl og persónliga vegleiðing. Til ber at tosa við lestrarvegleiðaran um skúlaviðurskifti og eisini um persónlig viðurskifti, sum ikki beinleiðis hava nakað við skúlan at gera. Lestrarvegleiðarin hevur tagnarskyldu, so tú kanst trygt venda tær til hansara.
Ivast tú í:
- hvønn studning tú hevur rætt til?
- hvussu tú søkir studning?
- hvørjar lærugreinar tú skalt velja annað og triðja árið?
- um tú kanst avriksflyta onkra lærugrein?
- hvørja útbúgving tú skalt velja aftaná miðnám?
So kanst tú venda tær til lestrarvegleiðaran.
Persónlig samrøða er altíð møgulig. Hendan kann fevna um:
- fakligu menningina hjá næminginum
- persónligu menningina hjá næminginum
- trivnaðin í flokkinum
- og annað
Ein samrøða kann vera stytri ella longri. Hon kann vera, tá ið lestrarvegleiðingin er opin ella eftir avtalu.
Sálarfrøðingar eru eisini knýttir at skúlanum. Lestrarvegleiðingin kann vísa til sálarfrøðing, um tørvur er á tí.
Sálarfrøðiskipanin á miðnámsskúlunum ger næmingarnar betri førar fyri at gjøgnumføra miðnám og minka um fráfallið, hóast møguligar sálarligar forðingar og/ella avbjóðingar. Endamálið er eisini at førleikamenna vegleiðingina í skúlunum, so hon er betur før fyri at taka hond um næmingarnar, sum hava tørv á sálarfrøðiligari hjálp.
Tilboðið er ókeypis og fevnir um upp til fimm viðgerðir við sálarfrøðingi.
Sálarfrøðingarnir eru:
Hansina Jacobsen - hansina@sernam.fo
Rigmor N. Arge - rigmor@sernam.fo
Til ber at gera avtalur at hitta sálarfrøðingarnar við at seta seg í samband við lestrarvegleiðingina ella skriva til sálarfrøðingarnar.
Ann Hermansdóttir er studentaprestur á miðnámsskúlunum kring landið.
Tað kann vera avbjóðandi at vera lesandi, og nógv annað enn lesnaðurin kann fylla í gerandisdegnum. Studentapresturin kann leggja oyra til tað, sum fyllur nógv hjá næminginum.
Studentapresturin hevur tagnaskyldu, og tað er ikki nøkur treyt at hava eina kristna sannføring fyri at venda sær til hana.
Studentapresturin hevur skrivstovu á Næmingatænastuni, har sálarfrøðingarnir og lestrarvegleiðarin halda til. Studentapresturin er á Miðnámi í Vestmanna 1. mánadag í hvørjum mánaði.
Næmingar eru altíð vælkomnir til eitt prát. Eisini ber til at ringja til Ann á tlf.: 237334 ella við at skriva til ann@kirkjan.fo.
Viðtalutíðir á heysti 2025:
Mán. 1. sep. kl. 10.00 - 14.00
Mán. 6. okt. kl. 10.00 - 14.00
Mán. 3. nov. kl. 10.00 - 14.00
Mán. 1. des. kl. 10.00 - 14.00
Hevur tú hug at vita meira um, hvat studentapresturin tekst við? Fylg henni á Instagram ella Facebook við at trýsta á ikonini.
